تل ابیب(مانیٹرنگ ڈیسک) اسرائیلی فوج کے سربراہ جنرل اویو کوچاوی نے انکشاف کیا ہے کہ فوج نے ایران پر جوابی حملے کے لیے گزشتہ ایک سال کے دوران تین منصوبے بنائے تھے اور ان کا بنیادی مقصد ایران کی جوہری تنصیبات اور اس کی مدد کرنے والے منصوبوں کو تباہ کرنا تھا۔
غیر ملکی میڈیا کے مطابق اپنی ریٹائرمنٹ سے ایک ہفتہ پہلے اسرائیلی فوج کے سربراہ جنرل اویو کوچاوی نے اپنے آخری میڈیا انٹرویو میں کہا کہ اگر کسی بھی وقت بڑی جنگ میں داخلے کی ضرورت ہوتی ہے تو اس مقصد کے لیے اضافی فوجی مقامات اور موجود فوجی اثاثوں کو نئی فہرست میں شامل کر لیا جائے گا۔جنرل اویو کوچاوی نے پوچھے جانے والے ایک سوال کے جواب میں دعویٰ کیا کہ ایران کے پاس کم از کم چار ایٹم بموں کی تیاری کے لیے افزودہ مواد موجود ہے جن میں سے 60 فیصد کی سطح پر ہے جب کہ تین 20 فیصد کی سطح پر ہیں۔اسرائیلی فوجی سربراہ نے واضح طور پر حزب اللہ کو دوران انٹرویو مخاطب کرتے ہوئے کہا کہ اگر اس نے صورتحال کو مزید خراب کیا تو فوج کے پاس انتہائی جارحانہ نوعیت کے منصوبے تیار ہیں جن پر فوری عمل درآمد کیا جائے گا، حزب اللہ کی کسی بھی مہم جوئی کی صورت میں اسرائیل لبنان کو 50 سال پیچھے سال پیچھے دھکیل دے گا اور اس کے تمام بنیادی ڈھانچے کو ٹارگٹ کرے گا کیونکہ صرف حزب اللہ کو نشانہ بنانے سے کچھ بھی حاصل نہیں ہو گا۔ ایک سوال کے جواب میں جنرل اویو کوچاوی نے کہا کہ ہمارے پیش نظر دو اہم اہداف ہیں۔ اول، ایران کے میزائلوں کی بابت پتہ کرنا تا کہ ضرورت کے وقت سب سے پہلے انہیں نشانہ بنایا جا سکے اور دوئم ایرانی میزائلوں کو بے اثر کرنے کے لیے درکار زیادہ مو¿ثر فضائی دفاعی نظام کا قیام عمل میں لانا ہے۔انتہائی دلچسپ بات ہے کہ جنرل اویو کوچاوی کا عبرانی زبان میں ہونے والے انٹرویو کو اہتمام کے ساتھ عربی زبان میں بھی شائع کیا گیا ہے جب کہ اس کے انگریزی ترجمے کی دستیابی بھی یقینی بنائی گئی ہے۔واضح رہے کہ اسرائیلی فوج کے سربراہ اپنی ریٹائرمنٹ کے وقت ایک روایت کے تحت میڈیا کو انٹرویو دیتے ہیں جس میں کئی انکشافات و اعترافات بھی کیے جاتے ہیں۔
