دبئی (مانیٹرنگ ڈیسک ) متحدہ عرب امارات (یو اے ای )نے دنیا بھر کے فری لانسرز کو بڑی خوشخبری سنا دی ہے ، نئے پروگرام کے تحت فری لانسرز کیلئے ورک پرمٹ پروگرام متعارف کرایا گیا ہے ۔
”پاکستان ٹائم “کے مطابق یو اے ای کی جانب سے ایک نئے پروگرام کو متعارف کرایا جارہا ہے جس کے تحت ہر شعبے سے تعلق رکھنے والے افراد عرب ملک میں فری لانسر کے طور پر ملازمت کر سکیں گے ، اس لچکدار ورک پرمٹ پروگرام کے تحت یو اے ای یا دنیا کے کسی بھی حصے سے تعلق رکھنے والے فری لانسرز اپنے گھر میں رہتے ہوئے متحدہ عرب امارات میں ملازمت کر سکیں گے۔
یو اے ای کے وزیر انسانی وسائل عبد الرحمان آل اوار کا کہنا ہے کہ اس نئے پروگرام کو 2023 کی تیسری سہ ماہی کے دوران متعارف کرائے جانے کا امکان ہے، جس کے تحت دنیا کے کسی بھی حصے میں رہنے والے فری لانسرز کے لیے متحدہ عرب امارات میں کام کرنا ممکن ہو جائے گا۔
عبدالرحمان آل اوار کا مزید کہنا تھا کہ ہر طرح کی صلاحیت رکھنے والے افراد کے لیے فری لانسنگ ورک پرمٹ جاری کرنے کے نئے پروگرام پر کام کر رہے ہیں، انہوں نے کہا کہ اس پروگرام سے لوگوں کو قانون کے دائرے میں رہتے ہوئے کام کرنے کا موقع ملے گا اور اس مقصد کے لیے انہیں رجسٹریشن کرانا ہوگی، نئی پالیسیوں کا مقصد ملازمتوں کے لیے لچکدار ریموٹ ورک (گھر میں رہتے ہوئے کام کرنے) کو یقینی بنانا ہے۔
