لاہور (مانیٹرنگ ڈیسک )رمضان المبارک کے دوسرے جمعہ کو مسجد الحرام میں نماز فجر کے بعد سے ہی نمازیوں کی بڑی تعداد مسجد میں آنا شروع ہوگئی تھی۔ رمضان المبارک کے دوسرے جمعہ مسجد حرام میں نمازیوں کی تعداد میں بڑا اضافہ دیکھنے میں آیا جہاں تقریباً 15 لاکھ افراد نے نماز جمعہ ادا کی جس کی تصویر بھی سوشل میڈیا پر شیئر کی گئی ہے۔
”پاکستان ٹائم“ کے مطابق رحمت و برکت والے مہینے میں پوری دنیا سے لاکھوں زائرین عمرے کی ادائیگی کے لیے مکہ مکرمہ پہنچتے ہیں جہاں لوگ پرسکون ماحول میں اپنی عبادت کی ادائیگی کرتے ہیں۔
رمضان المبارک کے دوسرے جمعے کو لگ بھگ ڈیڑھ ملین زائرین نے خانہ کعبہ کے سامنے نماز ادا کی۔ مسجدالحرام کی چھتیں ، راہداریاں ، فرش، تہہ خانے نمازیوں سے بھری ہوئی تھیں۔مسجد میں صفائی ستھرائی کا بھی بہترین انتظام تھا۔ٹریفک کے بھی بہترین انتطامات کئے گئے تھے۔ صدارت عامہ برائے امور مسجد حرام و مسجد نبوی کی جانب ست حرم کی راہداریوں، ہالز اور صحنوں میں انتظامیہ نے بہترین خدمات کانظام قائم کر رکھا تھا جس کے بدولت لاکھوں نمازیوں کے ہجوم کو کہیں بھی رکاوٹ کا سامنا نہیں کرنا پڑا۔انتظامیہ نے یہ بھی بتایا کہ بیت اللہ شریف کی مسجد میں بہترین صفائی اور ستھرائی کا بھی انتظام کیا گیا ہے، ماحول کو جراثیم سے پاک کرنے کے لیے اقدامات کیے گئے ہیں۔
