سربیا(مانیٹرنگ ڈیسک) چودہ سالہ مسلح طالب علم نے سکول میں اندھا دھند فائرنگ کر دی ،جس سے آٹھ بچے اور گارڈ ہلاک،جبکہ پانچ بچے شدید زخمی ہو گئے
’’پاکستان ٹائم ’’ کے مطابق سربیا کے شہر بلغراد کے ’ولادیسلاو ربنیکر اسکول‘ میں مسلح ملزم نے اندر گھس کر پہلے سیکیورٹی گارڈ کو قتل کیا اور پھر طلبا پر گولیوں کی بوچھاڑ کردی۔
فائرنگ میں آٹھ طلبا اور ایک سیکیورٹی گارڈ ہلاک جب کہ پانچ طلبا شدید زخمی ہوگئے۔ زخمیوں میں حالت نازک ہونے کے سبب ہلاکتوں میں اضافے کا خدشہ ظاہر کیاگیا ہے ۔
پولیس نے مسلح طالب علم کو حراست میں لے لیا جس نے فائرنگ کے لیے اپنے والد کا پستول استعمال کیا تھا۔ پولیس کے مطابق ملزم اسی اسکول میں ساتویں جماعت کا طالب علم ہے۔
تاحال ملزم کی شناخت ظاہر نہیں کی گئی اور نہ ہی فائرنگ کے محرک کا تعین ہوسکا ہے۔ تفتیش ابھی ابتدائی مراحل میں ہے۔
واضح رہے کہ سربیا میں بندوق کے سخت قوانین کے باعث فائرنگ کے واقعات شاذ و نادر ہی ہوتے ہیں تاہم مغربی بلقان میں 1990 کی دہائی میں جنگوں اور بدامنی کے بعد شہریوں کے پاس لاکھوں غیر قانونی ہتھیار موجود ہیں جنھیں ہتھیار جمع یا رجسٹر کرانے کے لیے کئی بار عام معافی کی پیشکش کی گئی ہے۔
