بوگوٹا (فارن ڈیسک) کولمبیا کے بوگوٹا ائیرپورٹ پر خاتون کے بیگ سے تین کروڑ 60 لاکھ کے زہریلے اور انگوٹھے سے بھی چھوٹے مینڈک برآمدکرلیے گئے جس پر پولیس نے جنگلی حیات کی سمگلنگ کے الزام میں خاتون کو گرفتار کرلیا۔ میڈیا اطلاعات کے مطابق خاتون کے بیگ سے 130 زہریلے مینڈک برآمد ہوئے تھے جن کی مالیت 3 کروڑ 60 روپے ہے،گرفتار کی جانے والی خاتون برازیلین شہری ہیں جو براستہ پاناما سا پالو جا رہیں تھیں۔ خاتون کا دعویٰ ہے کہ مینڈک انہیں جنوبی کولمبیا کی ایک مقامی برادری کی جانب سے تحفے کے طور پر دیے گئے تھے۔مقامی پولیس کا کہنا ہے کہ بلیک مارکیٹ میں ہر ایک مینڈک کی قیمت تقریبا 1,000 ڈالر ہے۔ مینڈکوں کو چھوٹے کنستروں میں انتہائی نامناسب حالات میں چھپا کر رکھا گیا تھا جس کی وجہ سے وہ پانی کی کمی کا شکار تھے۔
