لاہور(سٹاف رپورٹر)ملک بھر میں سردی کا راج برقرارہے، دیربالا میں بارش اور پہاڑوں پر برفباری کا نیا سلسلہ شروع ہوگیا ،لواری ٹنل، سیدگی جھیل اور کمراٹ میں ہر سو سفیدی چھاگئی،روشنیوں کے شہر کراچی میں سردی کے ساتھ ہی ساتھ آلودگی بھی برقرار ہے جبکہ درجہ حرارت 11 سے 13 ڈگری سینٹی گریڈ تک جاسکتا ہے۔
محکمہ موسمیات کے مطابق آج بھی ملک میں موسم سرد رہے گا تاہم شمالی بلوچستان، خیبرپختونخوا، گلگت بلتستان اور کشمیر میں ہلکی بارش اور پہاڑوں پر برفباری کا امکان ہے۔پنجاب کے میدانی علاقے شدید دھند کی لپیٹ میں رہیں گے، گزشتہ روز کم سے کم درجہ حرارت اسکردو میں منفی 13، لیہ میں منفی 11،استور اور گوپس میں منفی 9،ہنزہ میں منفی 8،پاراچنار میں منفی6، کالام اور گلگت میں منفی5، بگروٹ میں منفی 4 ڈگری سینٹی گریڈ ریکارڈ کیا گیا۔کراچی میں بھی سردہواوں کے ڈیرے ہیں، جس کے باعث موسم ٹھنڈا ٹھار ہوگیا۔کوئٹہ سمیت شمالی بلوچستان کے اکثر علاقوں میں بارش کے بعد موسم مزید سرد ہوگیا ہے۔مستونگ ،زیارت ،ہرنائی،ڑوب ،قلعہ عبداللہ ،قلعہ سیف اللہ ،چمن ،پشین اور دیگر علاقوں میں بارش ہوئی ہے جبکہ پہاڑوں پر برفباری کا امکان ظاہر کیا گیا ہے۔کوئٹہ میں کم سے کم درجہ حرارت04ڈگری،قلات میں کم سے کم منفی04،زیارت میں کم سے کم منفی02،ڑوب میں کم سے کم منفی01،بارکھان میں 03،تربت میں کم سے کم12،پنجگورمیں 02،گوادر اوراوڑمارہ کم سے کم 10،جیونی میں کم سے کم12 جبکہ پسنی میں 13،دالبندین میں کم سے کم 02 ،خضدار میں کم سے کم سے 07اور لسبیلہ میں 3سینٹی گریڈ ریکارڈ کیا گیا۔دوسری جانب کوئٹہ کے بیشتر علاقوں میں بجلی غائب ہے جبکہ گیس کی فراہمی بھی معطل ہے۔
دوسری جانب لاہور سمیت پنجاب میں دھند کے باعث حدنگاہ انتہائی کم ہو کر رہ گئی ہے، مسافروں کو شدید مشکلات کا سامنا ہے، موٹروے کو مختلف مقامات سے ٹریفک کے لئے بند کردیا گیا۔موٹر وے پولیس کے مطابق شدید دھند کے باعث موٹر وے ایم 2انٹرچینج سے پنڈی بھٹیاں، موٹروے ایم 3 فیض پور سے درخانہ، موٹروے ایم 4 ملتان سے فیصل آباد اور موٹروے ایم 5 موسیٰ والا سے آمد ورفت کے لئے بند ہے۔
موٹروے پولیس نے ہدایت کی ہے کہ شہری غیرضروری سفر سے گریز کریں۔
