ملتان (سپورٹس رپورٹر ) پی ایس ایل سیزن 8 میں سنسنی خیز مقابلے جاری ہیں، گزشتہ میچ ایک سکور سے ہارنے کے بعد ملتان سلطانز آج کوئٹہ گلیڈی ایٹرز سے پنجہ آزمائی کریں گے ۔
”پاکستان ٹائم “کے مطابق میزبان ٹیم ملتان سلطانز ہوم گراونڈ پر پہلے معرکے میں سرخرو نہیں ہو سکی تھی، لاہور قلندرز نے افتتاحی میچ میں سنسنی خیز مقابلے کے بعد ایک سکور سے فتح حاصل کی تھی، کھلاڑیوں کی پرفارمنس کی بات کی جائے تو کپتان محمد رضوان اور شان مسعود اچھی فارم میں ہیں، ڈیوڈ ملر، کیرون پولارڈ اور خوشدل شاہ بھی میچ ونر ہیں البتہ انھیں اچھے آغاز کو بڑے سکور میں تبدیل کرنے کیلئے ذمے داری کا مظاہرہ کرنا ہوگا۔
بولرز میں اسامہ میر نے کراچی کنگز کو جوائن کرنے والے عمران طاہر کا خلا بخوبی پر کیا، احسان اللہ بھی اچھی فارم میں ہیں، عقیل حسین، شاہنواز دھانی اور ثمین گل کو لائن و لینتھ بہتر بنانا ہوگی۔
دوسری جانب گزشتہ سیزن کی بانسبت متوازن نظر آنے والا کوئٹہ گلیڈی ایٹرز کا اسکواڈ بھی مہم کا فاتحانہ آغاز کرنے کا عزم لیے میدان میں اترے گا، مارٹن گپٹل اور جیسن روئے چھکے چھڑا سکتے ہیں، کپتان سرفراز احمد اننگز کو استحکام دینے کے اہل ہیں، افتخار احمد، عمر اکمل اور محمد نواز بھی بڑا اسکور بنانے کی صلاحیت رکھتے ہیں، محمد حفیظ متبادل کے طور پر سکواڈ کا حصہ بن چکے ہیں، پیس اٹیک کی بات کی جائے تو نسیم شاہ اور محمد حسنین امیدوں کیساتھ ساتھ سب کی آنکھو ں کا بھی محور ہوں گے۔
