اسلام آباد(سٹاف رپورٹر)چیف کوآرڈینیٹر انٹرنیشنل افئیرز بیرسٹر امجد ملک کی وزیر خزانہ پاکستان اور صدر انٹرنیشنل افئیرز سینیٹر اسحق ڈار کیساتھ وزارت خزانہ آفس میں خصو صی ملاقات،اوورسیز پاکستانیوں کی فلاح و بہبود کیلئے مختلف تجاویز پر تبادلہ خیال،مسلم لیگ ن کی اوورسیز میں تنظیم نو کی پراگریس کا جائزہ اور تمام باقی ممالک میں تنظیم سازی مکمل کرنے کا فیصلہ۔میاں نواز شریف کی قیادت پر مکمل اعتماد۔
تفصیلات کے مطابق مسلم لیگ ن انٹرنیشنل افیئرز کے چیف کوآرڈی نیٹر اور معروف قانون دان بیرسٹر امجد ملک نے وفاقی وزیر خزانہ سینیٹر اسحاق ڈار سے ملاقات کی،دونوں رہنماوں کے درمیان اوورسیز پاکستانیوں کی فلاح و بہبود کیلئے مندرجہ ذیل تجاویز پر تبادلہ خیال کیا گیا۔گلف میں مقیم تارکین وطن کے لئے مشین ریڈ ایبل پاسپورٹ اور شناختی کارڈ کی موجودگی میں اضافی نیکوپ کارڈ کی شرط کا خاتمہ،اوورسیز پاکستانیوں کیلئے اضافی فون کی ٹیکس فری سہولت،پاکستان کرکٹ بورڈ کی طرز پر اوورسیز پاکستانیز فاونڈیشن کا نیا بورڈ بھی تشکیل دینے کی درخواست کی اور اسی لاکھ اوورسیز پاکستانیوں کی پارلیمان میں نمائیندگی،انکے جائز مطالبات کا حل اور اسلام آباد میں انٹرنیشنل کانفرنس کے انعقاد کی سفارش کی۔وزیر خزانہ سینیٹر اسحق ڈار نے تمام گزارشات پر غور کر کے وزیراعظم پاکستان کیساتھ اٹھانے کا وعدہ بھی کیا۔
بعدازاں سینیٹر اسحق ڈار نے چیف کوآرڈینیٹر بیرسٹر امجد ملک کو سینیٹ کی کارروائی کے احوال کا مشاہدہ کرنے کا موقع فراہم کیا جبکہ مسیحی وفد کےساتھ کرسمس کا کیک بھی کاٹا۔
