ممبئی(شوبز ڈیسک)سدھو موسے والا کے قتل میں ملوث جیل میں بند گینگسٹر لارنس بشنوئی نے بالی ووڈ اداکار سلمان خان کو دھمکی دیتے ہوئے کہا ہے کہ وہ معافی مانگیں یا ’نتائج کا سامنا کرنے کے لیے تیار رہیں۔
بھارتی میڈیا کے مطابق جیل میں قید لارنس بشنوئی گینگ کے سرغنہ لارنس بشنوئی نے بالی ووڈ کنگ کو دھمکی دیتے ہوئے کہاہے کہ سلمان نے کالے ہرن کو مار کر ہماری برادری کی تذلیل کی، سلمان خان کی جلد یا بدیر اَنا توڑیں گے، ہمارے معاشرے میں سلمان خان کے لیے غصہ ہے، اس نے میرے معاشرے کی تذلیل کی، اس کے خلاف مقدمہ درج کیا گیا لیکن اس نے معافی نہیں مانگی، اگر وہ معافی نہیں مانگتے تو نتائج بھگتنے کے لیے تیار رہیں، میں کسی اور پر انحصار نہیں کروں گا۔گینگسٹر لارنس بشنوئی کا کہنا تھا کہ بچپن سے ہی میرے ذہن میں اس کے لیے غصہ ہے، جلد یا بدیر اس کی انا توڑوں گا، اسے ہمارے دیوتا کے مندر میں آکر معافی مانگنی چاہیے، اگر ہمارا معاشرہ معاف کر دے تو میں کچھ نہیں کہوں گا۔واضح رہے کہ گزشتہ سال جون میں ممبئی پولیس نے سلمان خان اور ان کے والد سلیم خان کو ’دھمکی آمیز خط‘ بھیجے جانے پر نامعلوم شخص کے خلاف ایف آئی آر درج کی تھی۔اس نوٹ میں 29 مئی کو پنجاب کے مانسا ضلع میں پنجابی گلوکار سدھو موسے والا کے قتل کا حوالہ دیتے ہوئے لکھا گیا تھا کہ، آپ کا وہی انجام ہوگا جو موسے والا کا ہواتاہم لارنس بشنوئی نے اس میں اپنے ملوث ہونے کی تردید کی۔ دہلی پولیس کے سپیشل سیل کے کمشنر نے موصولہ رپورٹ کے حوالے سے کہا تھا کہ لارنس بشنوئی گینگ کے ارکان نے سلمان کے ملازمین سے دوستی کرنے کی کوشش کی تھی۔
