لاہور (شوبز ڈیسک) پاکستان فلم انڈسٹری کے سپر سٹار فواد خان نے کہا ہے کہ ملکی سینما نے اپنے محدود وسائل کے ساتھ شاندار کامیابیاں حاصل کی ہیں۔
غیر ملکی نشریاتی ادارے کو انٹرویو میں فواد خان کا کہنا تھا کہ پاکستانی سینما کا عالمی سینما کے ساتھ موازنہ نہیں کرنا چاہئے کیوں کہ ہمارے وسائل اور مواقع بہت کم تعداد میں ہیں۔انہوں نے بتایا کہ آپ ایسی فلم کو جس کا بجٹ پندرہ سے بیس کروڑ ہو،اس کا مقابہ ایسی فلم سے نہیں کر سکتے جس کا بجٹ چار پانچ سو ملین ڈالر مختص کیا گیا ہو۔اداکار کا کہنا تھا کہ پاکستانی سینما میں اب حالات اچھے ہیں،لوگوں کو اچھا ریٹرن مل رہا ہے اور اگر یہ سرکل چلتا رہا تو پھر ہماری فلم انڈسٹری بھی ترقی کی راہ پر لگ جائے گی۔انہوں نے کہا کہ ہمارے فنکاروں کو غیر ملکی پروجیکٹ میں کام کرنا چاہئے لیکن اگر ہمیں دنیا میں اپنی شناخت بنانی ہے تو پھر ہمیں اپنے پروجیکٹ دنیا کو دکھانے پڑیں گے اور اس سے پوری دنیا میں ہماری پہچان بنے گی۔فواد خان نے بتایا کہ ہمیں تعداد کے بجائے معیار پر توجہ مرکوز رکھنی چاہئے، ڈیجیٹل سٹریمنگ پلیٹ فارمز ہمارے سینما کو آگے لے جانے کا ایک بڑا ذریعہ ثابت ہو سکتے ہیں۔
