ممبئی(مانیٹرنگ ڈیسک)ہندوستان کے معروف اداکار سورج پنچولی کو اداکارہ جیا خان خودکشی کیس میں10سال بعد بری کردیا گیا۔
میڈیا رپورٹس کے مطابق بھارتی تحقیقاتی ادارے( سی بی آئی)کی خصوصی عدالت نے 10 سال پرانے مقدمے کا فیصلہ سناتے ہوئے جیا خان کے بوائے فرینڈ اور بھارتی اداکار آدیتیہ پنچولی کے بیٹے سورج پنچولی کو بے قصور قرار دیا،سورج پر الزام تھا کہ انہوں نے اداکارہ کو خودکشی پر اکسایا۔عدالت نے فیصلے میں کہا کہ عدم شواہد کی بنا پر سورج کو اس کیس میں قصور وار نہیں ٹھہرایا جا سکتا لہذا عدالت انہیں بری کرتی ہے۔فیصلہ سنائے جانے کے موقع پر اداکار سورج پنچولی بھی عدالت میں موجود تھے۔اس کیس میں سورج پنچولی پر 2018 میں فرد جرم عائد کی گئی تھی تاہم اداکار نے صحت جرم سے انکار کیا تھا۔
یاد رہے کہ اپنے دور میں انتہائی تیزی سے مقبولیت پا کربھارت کی سپپرہٹ فلموں میں کام کرنے والی 25 سالہ اداکارہ جیا خان 3 جون 2013 کو جوہو میں اپنی رہائشگاہ پر پنکھے سے لٹکی پائی گئی تھیں۔جیا خان کی والدہ رابعہ نے افسوسناک واقعے کے بعد دعویٰ کیا تھا کہ اداکارہ کو ان کے قریبی دوست سورج پنچولی نے قتل کیا ہے۔بعد ازاں جیا کی جانب سے اداکار کو لکھے گئے آخری مبینہ خط کے ملنے کے بعد سورج کو گرفتار کیا گیا تھا۔ اداکار کے خلاف 2013 میں دفعہ 306 (خودکشی کے لیے اکسانا) کے تحت مقدمہ درج کیا گیا تھا۔
