کراچی (شوبز ڈیسک) سیاست پر بنائی گئی کامیڈی فلم ”وی آئی پی“ کا ٹریلر جاری کرتے ہوئے اسے عید الاضحی پر ریلیز کرنے کا اعلان کر دیا گیا۔
فلم ساز رانا کامران کی بنائی گئی فلم کے جاری کیے گئے مختصر ٹریلر سے عندیہ ملتا ہے کہ فلم میں نہ صرف سیاست بلکہ کامیڈی اور رومانس بھی دیکھنے کو ملے گا۔ اگرچہ ٹریلر میں زیادہ مار دھاڑ نہیں دکھائی گئی، تاہم معلوم ہوتا ہے کہ سیاست پر بنائی گئی فلم میں لڑائی جھگڑے بھی ہوں گے اور شائقین کو ایکشن بھی دیکھنے کو ملے گا۔ فلم کی مرکزی کاسٹ نئے چہروں پر مبنی ہے، تاہم بعض مرکزی کردار سینئر اداکاروں نے ادا کیے ہیں۔ فلم میں سلیم معراج، سیفی حسن، گل رعنا، محمد احتشام الدین اور دانش نواز کے علاوہ نئے چہروں میں نمرہ شاہد اور عرفان موتی والا بھی دکھائی دیں گے۔
