کراچی(شوبز ڈیسک)سابق فوجی صدر جنرل پرویز مشرف مرحوم کی پیروڈی سے شہرت پانے والے مشہور فنکار وسیم انصاری گزشتہ روز (4 جولائی کو) کراچی میں انتقال کر گئے۔
یہ بھی پڑھیں:فریال محمود کی نئی ڈانس ویڈیو نے سوشل میڈیا پر آگ لگا دی
میڈیا رپورٹس کے مطابق وسیم انصاری کے بیٹے کاشان انصاری نے بتایا کہ ان کے والد ذیابیطس اور ہائی بلڈ پریشر میں مبتلا تھے۔کاشان نے بتایا کہ ان کے والد یوٹیلیٹی بل بھرنے گئے تھے اور اچانک گر پڑے، انہیں فوری طور پر قریبی ہسپتال منتقل کیا گیا لیکن وہ جانبر نہ ہوسکے۔مرحوم کی نماز جنازہ گلستان جوہر کے علاقے میں واقع مریم مسجد نعمان گرینڈ سٹی میں ادا کی گئی، جبکہ نمازِ مغرب کے بعد وسیم انصاری کو مقامی قبرستان میں سپرد خاک کر دیا گیا۔انہوں نے اپنے پسماندگان میں ایک بیوہ، ایک بیٹا اور چار بیٹیاں چھوڑی ہیں۔وسیم انصاری سابق فوجی صدرجنرل(ر) پرویز مشرف مرحوم کی پیروڈی کرنے کے حوالے سے مشہور تھے،وہ نجی ٹی وی چینل”جیو نیوز“کے پروگرام ’ہم سب امید سے ہیں‘ میں پرویز مشرف کی پیروڈی کرتے تھے۔ان کے اس منفرد ہنر کی وجہ سے سامعین محظوظ ہوئے بلکہ وہ پاکستان کے سیاسی منظر نامے پر بھی متاثر کن تبصرہ کرتے تھے۔
یہ بھی پڑھیں:امیشا پٹیل نے پروڈیوسر انیل شرما پر سنگین الزامات عائد کر دیئے
سابق صدر پرویز مشرف کی طرح دکھنے والے وسیم انصاری کو ان کے مزاحیہ انداز کی وجہ سے ملک بھر میں بے حد پسند کیا جاتا تھا۔پروگرام ’ہم سب امید سے ہے‘ کی میزبانی اداکارہ صبا قمر کرتی تھیں، پروگرام میں سیاست کے سنجیدہ پہلو کو مزاحیہ انداز میں پیش کیا جاتا تھا۔یاد رہے کہ رواں سال 5 فروری کو سابق صدر پرویز مشرف کا بھی انتقال ہوا تھا، ان کا انتقال دبئی کے ہسپتال میں ہوا تھا جہاں وہ کئی عرصے سے زیر علاج تھے۔
