لاہور(کرائم رپورٹر) بنگال ٹائیگر کے ساتھ سرعام گھومنے پھرنے کی ویڈیو بنانے والے ٹک ٹاکر پنجاب وائلڈلائف کے ریڈار پر آگئے اور ویڈیو وائرل ہونے کے بعد پنجاب وائلڈلائف نے ٹائیگر برآمد کرکے تحویل میں لے لیا جبکہ ملزم ٹک ٹاکر نعمان حسین کے خلاف کارروائی کے لیے پولیس کو درخواست دی گئی ہے۔ حکام کے مطابق نعمان حسین کے خلاف پنجاب وائلڈ لائف لاہور کی ٹیم نے کارروائی شروع کردی ہے۔ ڈی جی وائلڈلائف کی ہدایت پر ڈپٹی ڈائریکٹر نے کارروائی کرتے ہوئے ٹائیگر کو نعمان حسین کے بریڈنگ فارم ہی میں بند کردیا اور ملزم کے خلاف وائلڈلائف ایکٹ کے تحت عدالت میں چالان پیش کردیا گیا ہے، عدالت ہی ملزم کو جرمانہ اورسزا دے سکتی ہے۔ قانونی ذرائع کے مطابق ملزم سے ٹائیگر کی خریداری کی رسید اور لائسنس طلب کیا جائے گا اور لائسنس نہ ہونے کی صورت میں ٹائیگر کو ضبط کرلیا جائے گا۔
