لاہور(شوبز ڈیسک)معروف اداکارہ ہانیہ عامر تیزی سے ترقی کی منازل طے کرنے والی اداکارہ اور ماڈل ہیں جس کے باعث ان کی مصروفیات بھی بے انتہا بڑھ گئی ہیں تاہم اب پاکستان کے معروف پوڈ کاسٹر عدنان فیصل نے حیران کن انکشاف کیا ہے کہ ہانیہ عامر نے ایک انٹرویو کے لیے غیر معمولی معاوضے کا مطالبہ کیا تھا۔
”پاکستان ٹائم“کے مطابق حال ہی میں معروف پوڈ کاسٹر عدنان فیصل نے ایک ٹی وی پروگرام میں بطور مہمان شرکت کی جس میں انہوں نے انکشاف کیا کہ میں نے ہانیہ عامر کو پوڈکاسٹ میں شرکت کرنے اور انٹرویو کے لیے دعوت دی تھی تاکہ ان سے کیریئر،زندگی اور شوبز کے حوالے سے گفتگو کی جا سکے لیکن ہانیہ عامر نے اس پیشکش کو فوراً قبول کرنے کے بجائے اس کے بدلے میں ایک خطیر رقم طلب کر لی۔عدنان فیصل کا کہنا تھا کہ جب انہوں نے ہانیہ عامر سے انٹرویو کا ذکر کیا تو اداکارہ نے 20 لاکھ روپے،یعنی 2 ملین روپے معاوضے کا مطالبہ کیا،یہ مطالبہ ان کے لیے نہایت حیران کن تھا کیونکہ انہوں نے پہلے کبھی کسی مہمان کو ادائیگی نہیں کی،وہ اب تک تقریباً 400 سے 500 پوڈکاسٹ ریکارڈ کر چکے ہیں اور ان میں شوبز،سیاست،کھیل،سوشل میڈیا اور دیگر شعبوں کی کئی نامور شخصیات شامل رہی ہیں لیکن انہوں نے کسی بھی مہمان کو انٹرویو کے بدلے کوئی معاوضہ نہیں دیا۔
عدنان فیصل نے اس بات پر بھی زور دیا کہ انڈسٹری میں سب فنکار برابر ہیں اور ان کے لیے کسی ایک کو معاوضہ دینا اور دوسرے کو نہیں دینا ممکن نہیں،ان کے پوڈ کاسٹ کا مقصد فنکاروں کی زندگی اور تجربات کو عوام تک پہنچانا ہے، نہ کہ کسی تجارتی معاہدے کی طرح لین دین کرنا۔یاد رہے کہ ہانیہ عامر کا شمار پاکستان کی مقبول ترین اداکاراوں میں ہوتا ہے اور ان کی شہرت سرحد پار بھارت تک بھی پہنچ چکی ہے،وہ زیادہ تر ماڈلنگ،کمرشلز اور ڈراموں پر توجہ دیتی ہیں جبکہ انٹرویوز میں کم ہی نظر آتی ہیں،ان کی سوشل میڈیا پر بھی زبردست فین فالوونگ ہے اور وہ اپنی دلکش شخصیت اور چلبلی طبیعت کی وجہ سے نوجوانوں میں بے حد مقبول ہیں۔اس معاملے پر سوشل میڈیا صارفین کی رائے بھی ملی جلی رہی۔کچھ لوگوں نے ہانیہ عامر کے مطالبے کو غیر حقیقی قرار دیا جبکہ کچھ کا کہنا تھا کہ اداکارہ اپنی محنت اور مقبولیت کے بدلے معاوضہ لینے کا پورا حق رکھتی ہیں،کچھ صارفین نے تو یہاں تک کہا کہ یہ ایک عام بین الاقوامی پریکٹس ہے کہ معروف شخصیات انٹرویوز کے لیے معاوضہ طلب کرتی ہیں۔یہ واقعہ ایک بڑی بحث کو جنم دے رہا ہے کہ آیا فنکاروں کو انٹرویوز کے لیے معاوضہ طلب کرنا چاہیے یا نہیں؟کچھ ماہرین کا کہنا ہے کہ اگر میڈیا ادارے اداکاروں کے انٹرویوز سے منافع کماتے ہیں تو فنکار بھی اس کا حصہ لینے کے حقدار ہیں جبکہ کچھ کا کہنا ہے کہ انٹرویوز کا بنیادی مقصد صرف عوام سے جڑنا ہونا چاہیے نہ کہ مالی فائدہ اٹھانا۔یہ معاملہ سوشل میڈیا پر بھی خاصی توجہ حاصل کر رہا ہے اور لوگ اس پر مختلف انداز میں تبصرے کر رہے ہیں۔ابھی تک ہانیہ عامر کی جانب سے اس حوالے سے کوئی ردِعمل سامنے نہیں آیا لیکن یہ بحث یقینی طور پر انٹرویو کلچر اور اس کے بدلتے ہوئے رجحانات پر روشنی ڈال رہی ہے۔
