دبئی (سپورٹس ڈیسک)بھارتی کرکٹ ٹیم کے سابق کپتان اور لیجنڈری کرکٹر محمد اظہر الدین نے کہا ہے کہ بابر اعظم اور محمد رضوان پاکستان کیلئے اہم کھلاڑی ہیں، بابر کو اپنی بیٹنگ پوزیشن کے بارے میں سوچنا پڑے گا، وہ اچھے پلیئر ہیں تاہم وہ قدرتی اوپننگ بیٹسمین نہیں ہیں۔
میڈیا رپورٹس کے مطابق دبئی میں ایک انٹرویو کے دوران سابق بھارتی کپتان اظہر الدین نے کہا کہ بابر اعظم کا اپنا سٹائل ہے، مار دھاڑ ان کا کھیل نہیں ہے، اگر بابر اعظم مار دھاڑ کیلئے جائیں گے تو ان کا نیچرل ٹیلنٹ ضائع ہوگا،ہر پلیئر کا اہم ہتھیار اس کا نیچرل ٹیلنٹ ہوتا ہے، اگر کوئی کھلاڑی اپنی قدرتی صلاحیت سے ہٹنے کی کوشش کرے گا تو ناکامی کا خدشہ رہے گا۔انہوں نے مزید کہا کہ بابر اعظم کو بطور کپتان مزید وقت ملنا چاہیے، اتنی جلدی کسی کپتان کو جج کرنا ٹھیک نہیں ہوتا، ہر کوئی وقت کے ساتھ سیکھتا ہے، بابر بھی سیکھ جائیں گے۔
