لاہور (ویب ڈیسک ) پاکستان سپر لیگ سیزن 8 کی ٹیم ملتان سلطانز کے فاسٹ بولر احسان اللہ کا کہنا ہے کہ انہوں نے یوٹیوب سے ویڈیوز دیکھ کر بولنگ کرانا سیکھی ہے ۔
نجی ٹی وی چینل سے گفتگو کرتے ہوئے احسان اللہ کا کہنا تھا کہ کوئٹہ گلیڈی ایٹرز کے خلاف پرفارمنس کوچز کی رہنمائی کی وجہ سے ہے، وکٹ ڈیڈ تھی لیکن تیزرفتاری سے بولنگ کرنے والوں کے لیے مددگار تھی، آنے والے میچز میں مزید تیز رفتاری سے بولنگ کیلئے پر عزم ہوں ۔
ملتان سلطانز کے احسان اللہ نے کہا کہ پی ایس ایل 8 میں میرا جو ٹارگٹ تھا وہ پورا ہو گیا،میں نے اپنی پرفارمنس کو اپنے امی ابو کے نام کیا ہے ، میری پسندیدہ وکٹ جیسن رائے کی تھی وہ دنیا کے بہترین بیٹرز میں سے ایک ہیں جبکہ میرے رول ماڈل وقار یونس ہیں، انہوں نے نیشنل ہائی پرفارمنس سینٹر میں میرے ساتھ کام بھی کیا ہے، میں بچپن سے وقار یونس کو دیکھ رہا ہوں اور پھر ان سے سیکھا بھی ہے، میں یوٹیوب پر وقار یونس کی بولنگ دیکھ دیکھ کر سیکھتا رہا ہوں۔
احسان اللہ کا کرکٹ کیریئر پر بات کرتے ہوئے کہنا تھا کہ میرا تعلق سوات سے ہے اور میں نے ٹیپ بال سے کرکٹ کھیلنا شروع کی، ماموں کے کہنے پر مردان اکیڈمی میں چلا گیا، فاسٹ بولرز کی تلاش کیلئے ہونے والے ٹرائیلز میں، میں نے 145 کی اسپیڈ سے بولنگ کی، انڈر 19 میں آیا اور پھر ایک سال غائب ہو گیا میرا کہیں نام نہ آیا۔
فاسٹ بولر کے مطابق اس کے بعد لاہور کی پاک لائن اکیڈمی نے مجھے اسپائکس کے ساتھ بولنگ کرنے کا موقع دیا جس سے فائدہ ہوا، مجھے میرے کوچ عبد الرحمان اور میڈیکل اور ٹریننگ اسٹاف نے بہت مدد کی، میری آج جو اسپیڈ ہے وہ سب ان لوگوں کی وجہ سے ہی ہے۔
