لاہور ( سپورٹس ڈیسک)پاکستان انڈر19 کرکٹ ٹیم نے بنگلا دیش انڈر 19 کو دوسرے ون ڈے میں 78 رنز سے شکست دیدی۔ اسطرح اسے پانچ میچوں کی سیریز میں دو صفر کی برتری حاصل ہوگئی ہے۔ پاکستان انڈر19 نے پہلا ون ڈے 9 وکٹوں سے جیتا تھا۔
”پاکستان ٹائم“ کے مطابق ظہور احمد چودھری سٹیڈیم میں کھیلے گئے میچ میں میزبان ٹیم نے ٹاس جیت کر پاکستان کو بیٹنگ دی۔ پاکستان انڈر19 نے مقررہ 50 اوورز میں271 رنز بنائے۔پاکستانی اننگز کی خاص بات ازان اویس کی شاندار سنچری تھی جنہوں نے 125گیندوں پر پندرہ چوکوں کی مدد سے 105رنز اسکور کیے۔ انہوں نے پہلے ون ڈے میں بھی عمدہ بیٹنگ کرتے ہوئے69 رنز سکور کیے تھے۔ کپتان سعد بیگ نے51 رنز بنائے ان کی اننگز میں چار چوکے اور ایک چھکا شامل تھا۔ازان اویس اور سعد بیگ نے تیسر وکٹ کی شراکت میں 126رنز کا اضافہ کیا۔ شامل حسین 33۔ اور عامر حسین29 رنز اسکور کرنے میں کامیاب رہے۔ اقبال حسین ایمون نے 72رنز دے کر 4 اور مظفر رحمن نے52 رنز دے کر 3 وکٹیں حاصل کیں۔جواب میں بنگلا دیش انڈر 19 ٹیم 47 اوورز میں 193 رنز بناکر آو¿ٹ ہوگئی۔ شہاب جیمز 42 رنز کے ساتھ ٹاپ اسکورر رہے۔عادل بن صدیق نے40 رنز بنائے۔پاکستان انڈر19 کی طرف سے محمد اسمعیل نے دس اوورز میں46 رنز دے کر 3وکٹیں حاصل کیں۔ ایمل خان، علی اسفند اور عرفات منہاس نے دو دو کھلاڑیوں کو آو¿ٹ کیا۔ آزان اویس کو مین آف دی میچ قرار دیا گیا۔
