لاہور (سپورٹس رپورٹر ) چیئرمین پاکستان کرکٹ بورڈ (پی سی بی) نجم سیٹھی نے کہا ہے کہ ایشین کرکٹر کونسل ایشیا کپ کے حوالے سے پیر کو حتمی فیصلہ سنائے گا، اگر ایشیا کپ کی میزبانی پاکستان کو نہیں ملتی تو ہمیں اس کے لیے تیار رہنا ہوگا،پی سی بی کی ٹیم کو کہا ہے کہ ایشیا کپ پاکستان کے بغیر ہونے کی صورت میں 3 ملکی سیریز کا اہتمام کریں لیکن امید ہے کہ یہ کرنے کی ضرورت پیش نہیں آئے گی اور تمام ٹیمیں پاکستان آئیں گی۔ غیرملکی میڈیا کو دیئے گئے ایک انٹرویو میں نجم سیٹھی نے کہا کہ ہم بھارتی ٹیم کو سیکیورٹی فراہم کرنے کیلئے تیار ہیں لیکن پھر ورلڈکپ میں انہیں یہ ذمہ داری اٹھانا ہوگی، اگر بھارتی ٹیم لاہور، راولپنڈی یا کراچی میں کھیلنے کیلئے رضامند ہے تو ہمیں بھی کولکتہ، احمد آباد یا چنئی میں کھیلنے پر کوئی اعتراض نہیں۔ ملکی صورتحال کے سوال پر انہوں نے کہا کہ 6 ماہ سے ملک میں سابق وزیراعظم کی احتجاجی تحریک جاری ہے، اسی دوران انگلینڈ، آسٹریلیا اور نیوزی لینڈ کی ٹیمیں سیریز کھیل کر گئیں، موجودہ ملکی صورتحال عارضی ہے، ایشیا کپ ستمبر میں ہونا ہے۔
