دوحہ(سپورٹس ڈیسک) انٹرنیشنل کرکٹ کونسل (آئی سی سی )نے نئی ٹیسٹ رینکنگ جاری کردی جس کے مطابق بلے بازوں میں نیوزی لینڈ کے کین ولیمسن پہلے نمبر پر براجمان ہیں جبکہ بولرز کی رینکنگ میں پہلی پوزیشن پر بھارتی فاسٹ بولر جسپریت بمراہ کا قبضہ برقرار ہے۔ آئی سی سی اعلامیہ کے مطابق بلے بازوں کی ٹیسٹ رینکنگ میں آسٹریلیا کے اسٹیو اسمتھ دوسرے اور انگلینڈ کے جو ئے روٹ رانچی میں اپنی 31 ویں ٹیسٹ سنچری کی بدولت تیسرے نمبر پر آگئے ہیںجبکہ پاکستانی بلے باز بابر اعظم ایک درجہ تنزلی سے 768 پوائنٹس کے ساتھ پانچویں نمبر پر آگئے ہیں۔ بائولرز کی ریکنگ میں کوئی پاکستانی ٹاپ ٹین میں جگہ نہیں بنا سکتا البتہ فاسٹ بولر شاہین شاہ آفریدی ایک درجہ ترقی کے ساتھ 12 ویں نمبر پر آگئے ہیں۔بھارت کے جسپریت بمراہ پہلے، روی چندرن ایشون دوسرے اور جنوبی افریقا کے کاگیسو ربادا تیسرے نمبر پر ہیں۔ آل راونڈرز کی رینکنگ میں بھارت کے رویندرا جڈیجا پہلے روی چندرن ایشون دوسرے اور بنگلا دیش کے شکیب الحسن تیسرے نمبر پر ہیں۔
