ٹوکیو(سپورٹس ڈیسک )جاپان کے شہرت یافتہ ریسلر اور سیاستدان انتونیو انوکی 79 برس کی عمر میں انتقال کرگئے،وہ علالت کے باعث کچھ عرصے سے ہسپتال میں زیرعلاج تھے۔
غیر ملکی میڈیا کے مطابق انوکی 4 بار رکن پارلیمنٹ رہے اور اپنی وفات تک جاپانی رکن پارلیمنٹ تھے،وہ جاپانی عوام میں انتہائی مقبول تھے اور ان کے انتقال پر جاپان کی حکومت اور عوام افسردہ ہیں۔انوکی پاکستان اور پاکستانی عوام سے بہت محبت اور انسیت رکھتے تھے، 1979 میں پاکستانی پہلوان زبیر عرف جھارا نے انہیں دنگل میں شکست دی تھی۔انوکی نے جھارا پہلوان کی وفات کے بعد ان کے بھتیجے کو جاپان میں اپنی نگرانی میں تربیت دی تھی،وہ پاکستان اور بھارت کے درمیان امن کے فروغ کے لیے واہگہ بارڈر پر امن واک کرنا چاہتے تھے۔
رپورٹس کے مطابق انوکی نے عراق امریکا جنگ کے دوران صدام حسین سے ذاتی تعلقات کی بنا پر درجنوں جاپانی شہریوں کو رہائی بھی دلوائی تھی۔انوکی نے صدام حسین کی دعوت پر ہی اسلام قبول کیا جس کے بعد ان کا اسلامی نام محمد حسین انوکی رکھا گیا تھا۔
