میلبرن(سپورٹس رپورٹر)آئی سی سی ٹی20 ورلڈ کپ کے فائنل میں انگلینڈ نے سیم کرن اور بین سٹوکس کے عمدہ کھیل کی بدولت پاکستان کو 5 وکٹوں سے شکست دے کر دوسری مرتبہ ٹی20 چیمپیئن بننے کا اعزاز حاصل کر لیا۔انگلینڈ نے 2010 میں ویسٹ انڈیز میں کھیلے گئے ٹی20 ورلڈ کپ کے فائنل میں آسٹریلیا کو 7 وکٹوں سے شکست دے کر پہلی مرتبہ عالمی چیمپیئن بننے کا اعزاز حاصل کیا تھا۔انگلینڈ اس وقت ون ڈے کرکٹ کا بھی چیمپیئن ہے،میزبان انگلینڈ نے 2019 میں نیوزی لینڈ کو دلچسپ مقابلے کے بعد شکست دے کر ایک روزہ کرکٹ کی تاریخ میں پہلی مرتبہ ٹائٹل جیتا تھا۔
80 ہزار سے زائد شائقین سے بھرے میلبرن کے سٹیڈیم میں کھیلے گئے میچ میں انگلینڈ کے کپتان جوز بٹلر نے ٹاس جیت کر ابر آلود موسم میں پاکستان کو پہلے بیٹنگ کی دعوت دی۔پاکستان کے اوپنرز نے میچ کی ابتدائی گیند نو بال ہونے کے باوجود محتاط انداز میں اننگز کا آغاز کیا۔ابتدائی تین اوورز میں 16 رنز کے بعد تیسرے اوور میں اوپنرز نے نسبتاً تیز سکور کیا اور کرس ووکس کے اوور میں 12 رنز بٹورے۔اوپنرز نے پاکستان کو 29 رنز کا آغاز فراہم کیا لیکن اسی سکور پر محمد رضوان وکٹیں محفوظ نہ رکھ سکے اور سیم کرن کا شکار بن گئے۔شان مسعود اور بابر اعظم نے مل کر سکور کو 84 تک پہنچایا لیکن اسی اسکور پر عادل رشید کی گیند پر بابر اعظم انہی کو کیچ دے کر چلتے بنے،انہوں نے 28 گیندوں پر 32 رنز بنائے۔عادل رشید نے وکٹ میڈن اوور کرایا اور ابھی پاکستانی ٹیم اس نقصان سے سنبھلی بھی نہ تھی کہ اگلے اوور میں افتخار بھی چھ گیندوں پر بغیر کوئی رن بنائے بین سٹوکس کا شکار بن گئے۔شاداب خان اور شان مسعود نے پانچویں وکٹ کے لیے 36 رنز جوڑے لیکن شان ایک بڑا شاٹ کھیلنے کی کوشش میں لیام لیونگسٹن کو آسان کیچ دے بیٹھے، انہوں نے 27 گیندوں میں 38 رنز بنائے۔پاکستان کو ایک اور بڑا نقصان اس وقت ہوا جب شاداب بھی 20 رنز بنانے کے بعد کرس جورڈن کا شکار بنے۔نواز کا بھی وکٹ پر قیام مختصر رہا اور وہ بھی صرف 5 رنز بنا کر پویلین لوٹ گئے جبکہ محمد وسیم نے 8 گیندوں پر 4 رنز بنائے۔پاکستان نے مقررہ اوورز میں 8 وکٹوں کے نقصان پر 137رنز بنائے۔
انگلینڈ نے ہدف کا تعاقب شروع کیا تو پہلے ہی اوور میں شاہین شاہ آفریدی نے ایلکس ہیلز کی وکٹیں بکھیر دیں۔نسیم شاہ اگلے اوور میں درست لینتھ پر باولنگ نہ کر سکے اور ان کے پہلے ہی اوور میں تین چوکوں سمیت 14 رنز بنے۔7 رنز پر پہلی وکٹ گرنے کے بعد فل سالٹ اور جوز بٹلر نے سکور کو 28 رنز تک پہنچایا لیکن اسی سکور پر حارث روف کی گیند پر فل سالٹ پویلین لوٹ گئے۔جوز بٹلر کئی بار باہر جاتی ہوئی گیند پر آوٹ ہونے سے بچے لیکن پھر حارث روف کی گیند پر اسی طرح سے اپنی وکٹ گنوا بیٹھے تاہم آوٹ ہونے سے قبل انہوں نے 26 رنز بنائے۔تین وکٹیں گرنے کے بعد سٹوکس کا ساتھ دینے ہیری بروکس آئے اور دونوں نے ذمے دارانہ کھیل پیش کرتے ہوئے سکور کو آگے بڑھانا شروع کیا۔دونوں کھلاڑیوں نے سکور کو مل کر 84 تک پہنچایا لیکن شاداب کی گیند کو باونڈری کے پار پہنچانے کی کوشش میں ہیری بروک شاداب خان کو وکٹ دے بیٹھے۔میچ 15ویں اوور میں سنسنی خیز مرحلے میں داخل ہو گیا تھا کیونکہ انگلینڈ کو آخری پانچ اوورز میں فتح کے لیے 41 رنز درکار تھےتاہم گرین شرٹس کو اس وقت دھچکا لگا جب شاہین شاہ آفریدی انجری کا شکار ہو کر اپنا اوور ادھورا چھوڑ کر ڈگ آوٹ کی جانب واپس لوٹ گئے۔اس خلا کا انگلینڈ نے بھرپور فائدہ اٹھایا اور افتخار کی پانچ گیندوں پر 13 رنز بٹورنے کے بعد محمد وسیم کے اگلے اوور میں 16 رنز بنا کر فتح کی راہ ہموار کر لی۔فتح سے چند رنز کی دوری پر انگلینڈ کی ٹیم معین علی کی وکٹ گنوا بیٹھی لیکن اس کے باوجود انہیں ہدف تک رسائی میں مزید کوئی مشکل پیش نہ آئی اور ایک اوور قبل فتح حاصل کرلی۔
انگلینڈ نے پانچ وکٹ کے نقصان پر ہدف تک رسائی حاصل کر کے دوسری مرتبہ ٹی20 چیمپیئن بننے کا اعزاز حاصل کر لیا۔بین سٹوکس نے ایک مرتبہ پھر بڑے میچ کے بڑے کھلاڑی ہونے کا ثبوت دیتے ہوئے ناقابل شکست 52 رنز کی اننگز کھیلی اور اپنی ٹیم کی فتح میں اہم کردار ادا کیا۔پاکستان کی جانب سے حارث روف نے 2 وکٹیں حاصل کیں جبکہ شاہین شاہ آفریدی، محمد وسیم اور شاداب خان نے ایک،ایک وکٹ لی۔سیم کرن کو شاندار سپیل پر مین آف دی میچ کا ایوارڈ دیا گیا جبکہ انہیں پلیئر آف دی ٹورنامنٹ بھی قرار دیا گیا۔اس فتح کے ساتھ ہی انگلینڈ کی ٹیم بیک وقت ایک روزہ اور ٹی20 کا ورلڈ کپ جیتنے والی دنیا کی پہلی ٹیم بن گئی۔
