لاہور(سپورٹس رپورٹر)پاکستان کرکٹ بورڈ (پی سی بی) کے سابق چیئرمین اور ماضی کے سٹار بلے باز رمیز راجہ نے کہا ہے کہ وہ لوگ بورڈ میں آ گئے ہیں جن کا کرکٹ سے کوئی لینا دینا نہیں۔
”پاکستان ٹائم “ کے مطابق اپنے یوٹیوب چینل پر گفتگو کرتے ہوئے سٹار کرکٹر رمیز راجا نے کہا کہ یہ کھیل صرف اور صرف کرکٹرز کیلئے ہے،کرکٹ بورڈ میں سیاست نہیں ہونی چاہیے،نجم سیٹھی کو لانے کیلئے پورا آئین تبدیل کردیا گیا،اس طرح کی چیزوں سے دکھ ہوتا ہے،اب کوچز کو تبدیل کرنے کی باتیں ہو رہیں ہیں،مکی آرتھر کو لانے کا سوچ رہے ہیں،ثقلین مشتاق کو بھی عزت دیں۔رمیر راجا کا کہنا تھا کہ قومی ٹیسٹ سکواڈ میں تبدیلی کرنا خطرے سے خالی نہیں،پاکستان ٹیم ون ڈے اور ٹی 20 کرکٹ میں اچھا پرفارم کر رہی ہے۔انگلینڈ کیخلاف سیریز ہمارے لیے ایک سبق ہے۔رمیز راجہ نے کہا کہ ایشیا کپ کی میزبانی ہمیں ملی تو بھارت نے کہا ہم وہاں نہیں جائیں گے،بھارت کے یہاں نہ آنے کے معاملے پر ہم نے سٹینڈ لیا،جہاں پاکستان کیساتھ زیادتی ہو گی وہاں ہم سٹینڈ لیں گے،بھارت سے ہمیشہ مجھے بہت پیار ملا ہے لیکن بھارت کیخلاف پاکستان کی جیت ضروری ہے۔
یاد رہے کہ اس سے قبل پی سی بی کے نئے سربراہ نجم سیٹھی کا کہنا تھا کہ رمیز راجہ کو نہیں روکا جائے گا،وہ کمنٹری پینل کا حصہ بننے تو ضرور آئیں گے،بابر پاکستان کے سٹار ہیں،اگر وہ نہیں تو ٹیم کچھ نہیں،وہ ہمارے دلوں میں بیٹھا ہمارا بچہ ہے۔ان کا کہنا ہے کہ بھارت جانے پر میرا پہلے والا موقف ہے ، یہ فیصلہ سیاسی ہوتاہے۔حکومت کہے گی کہ جاو تو جائیں گے ورنہ نہیں،میں سلیکٹرز لگادوں گا پھر ان کی مرضی وہ کیا کریں گے،ابھی ہم نے عبوری سلیکشن کمیٹی بنائی ہے اس کی کارکردگی دیکھیں گے۔ٹیم اچھی بنے اور وننگ حکمت عملی پر سوچیں یہ پلان ہونا چاہیے،میں نے مکی آرتھر سے خود رابطہ کیا تھاوہ خود ہمیں اچھے کوچز کے نام دے دیں گے۔مکی آرتھر کے معاملے پر میں آپکو اگلے دس دنوں میں مکمل خبر دوں گا۔
